നിനക്കുളുപ്പില്ലെടാ ചെക്കാ?

എഞ്ചിനീയര്‍ ആകാന്‍ അത്രക്കങ്ങു പൂതിയാണെങ്കില്‍ എന്‍ട്രന്‍സ്‌ കോച്ചിങ്ങിനു പഠിക്കാന്‍ വിട്ട കാലത്ത് ഉച്ചപ്പടത്തിനു പോയി തേരാപ്പാരാ നടക്കാതെ നാലക്ഷരം പഠിച്ചു നല്ല റാങ്ക് വാങ്ങണം... അല്ലാതെ അപ്പന്‍റെ കയ്യില്‍ പൂത്ത കൊപ്ര വിറ്റ പണം ഉണ്ടെന്നു കരുതി വല്ല പണം വിഴുങ്ങി സ്വാശ്രയ കോളേജിലും ചേര്‍ന്ന് പഠിച്ചിട്ടുണ്ടെങ്കില്‍ അവിടെ തന്നെ അങ്ങ് തീര്‍ത്തോളണം പഠനം. അല്ലാതെ നിന്നെപ്പോലെ ഇരുപത്തെഴായിരവും അമ്പത്താറായിരവും ഒക്കെ റാങ്ക് വാങ്ങിയ പൊട്ടന്മാര്‍ക്ക് പടിക്കാനുള്ളതല്ല ഇവിടുത്തെ സര്‍ക്കാര്‍ കോളേജുകള്‍. അവിടെ പഠിക്കുന്നത് ബുദ്ധിയും വിവരവും ഉള്ള പിള്ളേരാ.. ആയിരവും ആയിരത്തഞ്ഞൂറും റാങ്ക് ഉള്ളവര്‍ പഠിക്കുന്ന കോളേജിലാ അവന്‍റെ ഒരു ഇരുപത്തെഴായിരം. അതും പോരാഞ്ഞ് വന്ന വരവോ? മോനെ, ഓരോ സെമസ്റ്ററിലും പരീക്ഷ നടത്തുന്നത് തമാശക്കല്ല, പാസാവാനാ...  ഇനിയിപ്പോ നിനക്ക് നല്ലത് പട്ടിക്കാട് തന്നെ, അതിനു അവര് സമ്മതിക്കുമോ ആവോ? എന്തായാലും ആദ്യം നിന്‍റെ ചാണ്ടിയും ഷാഫിയും ഒക്കെ പറയുന്നത് കേള്‍ക്കാതെ വല്ലതും നാലക്ഷരം പഠിച്ചു മൂന്നാം സെമസ്റ്റര്‍ പാസാകാന്‍ നോക്ക്... ഉമ്മന്‍ ചാണ്ടി പറഞ്ഞാല്‍ നീ ചിലപ്പോള്‍ എന്തും കേള്‍ക്കുമായിരിക്കും.. മുല്ലപ്പെരിയാറിന്‍റെ മോളീന്ന് ചാടുകയും ചെയ്തോ.. ചാണ്ടി പറയുന്ന ഏതു കോളേജിലും ഏതു ബ്രാഞ്ചിലും ഏതു സെമ്മിലും ചേരും എന്ന് പറയാന്‍ നിനക്ക് ചിലപ്പോള്‍ വിവരക്കേടുണ്ടായിരിക്കും.. അത് തെറ്റല്ല.. പക്ഷെ വിവരമില്ല എന്നതിന്‍റെ പേരില്‍ അഹങ്കരിക്കല്ലേ മോനെ.. അങ്ങനെ എല്ലാം ചാണ്ടി പറയുന്നത് പോലെ നടക്കാന്‍ ഈ പരീക്ഷ നടത്തുന്നതും അഡ്മിഷന്‍ നടത്തുന്നതും ഒന്നും അങ്ങേരുടെ അളിയന്മാരല്ല... ഇനിയിപ്പോ വല്ല അളിയന്മാരും ഉണ്ടെങ്കില്‍ തന്നെ അതൊക്കെ കണ്ടു പിടിച്ചു പൂട്ടിയിടാന്‍ ഇവിടെ വേറെ ആമ്പിള്ളേരുണ്ട്.
ചാണ്ടിക്കിട്ടു പണിയാന്‍ ചെന്നിത്തല കുഴിച്ച കുഴിയില്‍ നീയും ചാണ്ടിയും വൃത്തിയായി വീണു എന്നതാ ഇതിന്‍റെ ഗുട്ടന്‍സ്‌ എന്ന് മനസ്സിലാക്കിക്കോ..  ചാണ്ടിയെ കൊണ്ട് ഉത്തരവിടുവിച്ചു മൂപ്പരെ കുടുക്കാന്‍ സ്വന്തം വിശ്വസ്ത പ്രവര്‍ത്തകന്‍റെ മകന്‍റെ അഡ്മിഷന്‍ തന്നെ ചെന്നിത്തല കരുവാക്കി... എന്തായാലും ഇപ്പോള്‍ നിനക്ക് കുറച്ചു കാര്യങ്ങളൊക്കെ മനസ്സിലായല്ലോ.. എസ്.എഫ്.ഐ. എന്ന സാധനം എന്താണെന്നും എങ്ങനെയാണെന്നും? ഇത് നിന്‍റെ കെ.എസ്.യു. പോലെ മോളീന്ന് കെട്ടിയിറക്കിയ പൌഡര്‍ കുട്ടപ്പന്മാരുടെ സംഘടനയല്ല.. വിദ്യാര്‍ഥികളുടെ ന്യായമായ അവകാശങ്ങള്‍ക്ക് വേണ്ടി ചോര കുറെ കൊടുത്ത പ്രസ്ഥാനമാ എസ്.എഫ്.ഐ. വിദ്യാര്‍ഥികളുടെ പേര് കളയാന്‍ നടക്കുന്ന രണ്ടും കെട്ടവര്‍ക്കെതിരെ പ്രതികരിക്കാനും അറിയാം.

എന്തായാലും ഇനി മോനൊരു കാര്യം ചെയ്യ്.... അച്ഛന്‍ അപകടം കാരണം കൊപ്രാകച്ചവടം നിര്‍ത്തി റസ്റ്റില്‍ ആണെന്നാണല്ലോ പത്രമുത്തശി കണ്ണീര്‍ തൂവിയത്.. ആ "നിഷ്കളങ്കരായ" മാതാ പിതാക്കളോട് മറ്റേ സംഭവം... ഏത് - മനുഷ്യത്വം - കാണിച്ചു നന്നാവാന്‍ നോക്ക്... അത് കൊണ്ട് പട്ടിക്കാടെങ്കില്‍ പട്ടിക്കാട്. കെ.എസ്.യു പറയുന്നതൊന്നും കേള്‍ക്കാന്‍ നില്‍ക്കാതെ ഇനിയെങ്കിലും  നാലക്ഷരം പഠിച്ചു പേരിനെങ്കിലും ഒരു എഞ്ചിനീയര്‍ ആകാന്‍ നോക്ക്... ഒന്നുമില്ലെങ്കിലും വീട്ടുകാര്‍ക്കെങ്കിലും ഒരു ഗുണമാകട്ടെ...
വാല്‍:
ബഹു.മുഖ്യമന്ത്രിയോട് ഒരു അഭ്യര്‍ത്ഥന....
മനുഷ്യത്വപരമായി ചിന്തിക്കുകയാണെങ്കില്‍ കേരളത്തില്‍ പത്താം ക്ലാസില്‍ തോല്‍ക്കുന്ന എല്ലാ വിദ്യാര്‍ഥികളെയും കേരളത്തിലെ സര്‍ക്കാര്‍ വക എഞ്ചിനീയറിംഗ് കോളേജുകളില്‍ ചേര്‍ക്കാന്‍ നിയമം ഉണ്ടാക്കണം. ബൈക്കപകടത്തില്‍ പെട്ട എല്ലാ കൊപ്രാ കച്ചവടക്കാരുടെയും മക്കള്‍ക്ക്‌ ഐ.എ.എസ് കൊടുക്കണം. മെഡിക്കല്‍ - എന്ജിനീയറിംഗ് പ്രവേശനം ഏറ്റവും പിന്നിലെ റാങ്കില്‍ നിന്നും മുന്നോട്ട് നടത്തണം.. റാങ്ക് കുറഞ്ഞത് അവരുടെ തെറ്റല്ലല്ലോ.. ഒന്നാം റാങ്ക്കാര്‍ തീരെ മനുഷ്യത്വമില്ലാത്ത ദുഷ്ടന്മാര്‍ ആയതുകൊണ്ടാണല്ലോ പാവപ്പെട്ട കൊപ്രാ കച്ചവടക്കാരുടെ മക്കളെ പിന്തള്ളി അവര്‍ മുന്നിലെത്തിയത്.