ഒരു നിമിഷം...

"നിധിയല്ല, മുടിയല്ല, മതമല്ല പ്രശ്നം... എരിയുന്ന, പൊരിയുന്ന വയറാണ് പ്രശ്നം..."

December 10, 2012

ക്ളാസെടുക്കരുത്, കണക്കെടുക്കൂ...


സെൻസസും തെരഞ്ഞെടുപ്പും പോലുള്ള നിരവധി സർക്കാർ നിയന്ത്രിത പ്രവർത്തനങ്ങൾക്ക് സർക്കാർ ജീവനക്കാരെ - പ്രത്യേകിച്ചും അധ്യാപകരെ - നിയോഗിക്കുന്നുണ്ട്. ഇതിനോടനുബന്ധിച്ച കാര്യങ്ങളും പരിശീലനവും മറ്റുമായി അവരുടെ ജോലിദിവസങ്ങളുടെ വലിയൊരു ഭാഗം നീക്കിവെക്കപ്പെടുന്നതു മൂലം സർക്കാർ ഓഫീസുകളുടെയും സ്കൂളുകളുടെയും പ്രവർത്തനത്തിൽ തടസ്സം നേരിടുന്നുണ്ട്. ഈയുള്ളവന്റെ വാമഭാഗം - അദ്ധ്യാപികയാണ് - ഇപ്പോൾ എൻ.പി.ആർ (national population register) സംബന്ധമായ പ്രവർത്തനത്തിലാണ്. കഴിഞ്ഞ മൂന്നു നാലു വർഷത്തിനിടെ വന്ന സെൻസസ്-തെരഞ്ഞെടുപ്പ് സംബന്ധമായ പ്രവർത്തനങ്ങളിൽ തൊണ്ണൂറു ശതമാനവും ചെയ്യേണ്ടി വന്നിട്ടുണ്ട്. മിടുക്കന്മാർ എന്തെങ്കിലും കാരണം പറഞ്ഞ് ഇതിൽ നിന്നെല്ലാം ഒഴിഞ്ഞു നിൽക്കും. മേലധികാരികളിലും ഡ്യൂട്ടി നൽകുന്ന സർക്കാർ ഓഫീസുകളിലും സ്വാധീനമില്ലാത്തവർ എല്ലാറ്റിനും പോകേണ്ടിയും വരുന്നു. വിദ്യാർത്ഥികൾക്ക് പാഠഭാഗം തീർന്നിട്ടില്ലെന്ന വേവലാതി ഒരു വശത്ത് - ദിവസം മുഴുവൻ വെയിലും പൊടിയുമേറ്റ് അലഞ്ഞു നടക്കേണ്ടതിന്റെ കഷ്ടപ്പാട് മറുവശത്ത്... ആരോടു പറയാൻ? 
എമ്പ്ലോയ്മെന്റ് എക്സ്ചേഞ്ചിൽ പേരു രജിസ്റ്റർ ചെയ്ത് ഒരു സർക്കാർ ജോലിക്കായി കണ്ണിൽ എണ്ണയൊഴിച്ചു കത്തിരിക്കുന്ന അനേകമനേകം അഭ്യസ്ത വിദ്യരുടെ നാടല്ലേ കേരളം? ഇത്തരം ഡ്യൂട്ടികൾക്ക് അവരെ നിയോഗിച്ചാൽ എന്താണു പ്രശ്നം? ഇതിനൊക്കെ നിയോഗിക്കപ്പെടുന്ന സർക്കാർ ജീവനക്കാർക്ക് (ജോലി ചെയ്യാതെ മറ്റു ചുമതലകൾക്കായി പോകുന്ന ദിവസത്തെ) അവരുടെ ശമ്പളം നയാപൈസ കുറയാതെ നൽകുന്നതോടൊപ്പം ഓരോ ഡ്യൂട്ടിക്കും പ്രതിഫലവും പുറമേ നൽകുന്നുണ്ട്. ഈ എക്സ്ടാ വേതനം തൊഴിൽ രഹിതർക്കു നൽകി അവരെ സഹായിക്കാനും വിദ്യാലയങ്ങളും ഓഫീസുകളും തടസ്സം കൂടാതെ നടത്താനുമുള്ള നീക്കം എന്താണിതുവരെയും അധികാരികളുടെ ഭാഗത്തു നിന്നും ഇല്ലാത്തത്? 
സർക്കാർ ജീവനക്കാരല്ലെങ്കിൽ ഉത്തരവാദിത്വത്തോടെ ചുമതലകൾ നിർവഹിക്കില്ല എന്നും വീഴ്ചകൾക്ക് എതിരെ നടപടി എടുക്കാൻ കഴിയില്ല എന്നും ആയിരിക്കും അധികാരികൾക്കു തരാനുള്ള വിശദീകരണം. പക്ഷെ, ജോലിയിൽ ഉള്ളവർക്ക് ഡ്യൂട്ടിയിൽ വരുത്തുന്ന വീഴ്ച മൂലം തങ്ങളുടെ ജോലി നഷ്ടപ്പെടുമോ എന്നുള്ളതിനേക്കാൾ (അതിന് ഒരു ശതമാനം പോലും സാധ്യതയില്ല എന്നവർക്കറിയാം, അത്ര ഗുരുതരമായ വീഴ്ചയൊന്നും വരാതെ അവർ എന്തായാലും ശ്രദ്ധിക്കും, ചെറിയ തെറ്റുകൾക്ക് കൂടി വന്നാൽ ഒരു ഇംക്രിമെന്റ് കിട്ടാതിരിക്കുകയോ വൈകുകയോ ചെയ്യും, അത്ര തന്നെ) ഭയം ജോലി കിട്ടാത്തവർക്ക് വീഴ്ച വരുത്തിയാൽ ജോലി ഒരിക്കലും കിട്ടാതിരിക്കുമോ എന്നുണ്ടാകും. അതു കൊണ്ട് അവരായിരിക്കും കൂടുതൽ നന്നായി ജോലി ചെയ്യുക. അതു മാത്രമല്ല, ജീവനക്കാർക്ക് ഇത്തരം ജോലികൾക്കു ലഭിക്കുന്ന പ്രതിഫലം അത്ര വലുതായി തോന്നുന്നുണ്ടാവില്ല, പക്ഷെ തൊഴിൽരഹിതർക്ക് അതു വലിയ സംഖ്യ ആയിരിക്കും എന്നതു കൊണ്ട് പ്രതിഫലം ലഭിക്കാൻ വേണ്ടിയെങ്കിലും അവർ കൃത്യമായി കാര്യങ്ങൾ ചെയ്യും.
ഇത്തരം കാര്യങ്ങളൊക്കെ നടപ്പിലാക്കാൻ ആരാണാവോ തടസ്സം. രാത്രി ഉറക്കമൊഴിച്ചിരുന്ന് പിറ്റേന്നു വിതരണം ചെയ്യേണ്ട നോട്ടീസും ഫോമും ഒക്കെ പൂരിപ്പിക്കുന്ന ഭാര്യയുടെ വിഷമം കാണേണ്ടി വരുന്ന (കൂടെ ഉറക്കമൊഴിച്ചിരുന്ന് സഹായിക്കേണ്ടി വരുന്ന, യേത്?) ഒരു ഭർത്താവിന്റെ വിഷമം ആരറിയാൻ?
വാൽ:
അടുത്ത ഡ്യൂട്ടിയെകുറിച്ച് ആലോചിക്കുമ്പോഴാ യു.ഡി.എഫ്. സർക്കാർ തുടരണേ എന്നു പ്രാർത്ഥിച്ച് പോകുന്നത്...

3 comments:

ഡോ.ആര്‍ .കെ.തിരൂര്‍ II Dr.R.K.Tirur said...

അടുത്ത ഡ്യൂട്ടിയെകുറിച്ച് ആലോചിക്കുമ്പോഴാ യു.ഡി.എഫ്. സർക്കാർ തുടരണേ എന്നു പ്രാർത്ഥിച്ച് പോകുന്നത്...

ASOKAN T UNNI said...

ഒരദ്ധ്യാപകന്‍/അദ്ധ്യാപിക അദ്ധ്യയനമുള്ളദിവസം എത്ര മണിക്കൂര്‍ ജോലിചെയ്യുന്നുണ്ട്‌..? ആഴ്ചയില്‍ എത്ര അദ്ധ്യയന ദിവസമുണ്ട്‌..? മാസത്തില്‍..?
ആകെമൊത്തം വര്‍ഷത്തില്‍ ശരാശരി അദ്ധ്യയന ദിവസങ്ങള്‍..?
-കുട്ടികളുടെ ക്ളാസുകള്‍ നഷ്ടപ്പെടുന്നതിലുള്ള ഉല്ക്കണ്ഠയും തൊഴിലില്ലാപ്പടയോടുള്ള പ്രേമവും തന്നെയാണോ ഡൊക്ടറെ ഈ വരികളെഴുതാന്‍ പ്രേരിപ്പച്ചത്..? അല്ലെന്നു ലേഖനത്തിലുടനീളം പറയാതെ പറയുന്നുണ്ട്.
*മിടുക്കന്മാര്‍ രക്ഷപെടുന്നു-----അസൂയ
*ദിവസം മുഴുവന്‍ വെയിലും പൊടിയുമേറ്റ് അലഞ്ഞുനടക്കുന്നതിലെ കഷ്ടപ്പാട്---വേണ്ടപ്പെട്ടവര്‍ ഇത്തിരിപോലും കഷ്ടപ്പെട്ടുകൂടല്ലോ.
*ജോലിചെയ്യാതെ ചിലര്‍ക്ക് വേതനം ലഭിക്കുന്നു----വീണ്ടും അസൂയ
*രാത്രി ഉറക്കമൊഴിച്ചിരുന്ന് പിറ്റേന്നത്തേക്കുള്ള ഫോമുകള്‍ പൂരിപ്പിക്കുന്നതിലെ വിഷമം.----ഇതല്ലേ യഥാര്‍ഥ പ്രശ്നം..!

ഇ.എ.സജിം തട്ടത്തുമല said...

വായന അടയാളപ്പെടുത്തുന്നു.

Related Posts Plugin for WordPress, Blogger...
എല്ലാ രോഗങ്ങള്‍ക്കുമുള്ള ഒറ്റമൂലി... സൗഹൃദം