ഒരു നിമിഷം...

"നിധിയല്ല, മുടിയല്ല, മതമല്ല പ്രശ്നം... എരിയുന്ന, പൊരിയുന്ന വയറാണ് പ്രശ്നം..."

December 29, 2010

ശബരിമലയിലെ തേങ്ങാതട്ടിപ്പ്

എല്ലാ ആരാധനാലയങ്ങളിലും എന്ന പോലെ ശബരിമലയിലും അല്ലറ ചില്ലറ തട്ടിപ്പുകള്‍ എല്ലാം നടക്കുന്നുണ്ടെന്ന് നമുക്കറിയാം. തൊഴാന്‍ പോകുമ്പോള്‍ തട്ടിപ്പിന്‍റെ മൂട് ചികയാന്‍ പോകാനുള്ള മടി കാരണം നമ്മളെല്ലാം തല്ക്കാലമങ്ങു കണ്ണടയ്ക്കും. എന്നാല്‍ കഴിഞ്ഞ ആഴ്ച മലയ്ക്ക് പോയി വന്ന ഒരു ബന്ധു പറഞ്ഞ കഥകേട്ട് ഈയുള്ളവന്‍ ചിരിക്കണോ കരയണോ എന്ന അവസ്ഥയിലായിപ്പോയി.
ശബരിമലയിലായാലും ഗുരുവായൂരിലായാലും തൊഴാന്‍ വരുന്ന അന്യസംസ്ഥാനക്കാരെ കുറിച്ച് നമുക്കെല്ലാം അറിയാമല്ലോ. ഭാഷ അറിയില്ല, ഇവിടുത്തെ ആചാരങ്ങളറിയില്ല, ആകെ മൊത്തം കണ്ഫ്യൂഷന്‍. ഒരു ബസ്സില്‍ നിന്നും ഒരു പട സ്വാമിമാര്‍ ഇറങ്ങും... പിന്നെ "മുന്‍പേ ഗമിക്കുന്ന ഗോവ് തന്‍റെ പിന്‍പേ ഗമിക്കുന്നു ഗോക്കളെല്ലാം" എന്ന് പറഞ്ഞ പോലെ ആദ്യം പോകുന്ന ആള്‍ എന്ത് ചെയ്യുന്നോ, അതെല്ലാം പിന്നാലെ വരുന്നവരും ചെയ്യും. ക്ഷേത്രത്തിലെ ഏതെങ്കിലും മൂലയില്‍ ഏതെങ്കിലും ഭക്തന്‍ ചെയ്യുന്നതു കണ്ടായിരിക്കും പ്രസ്തുത "ലീഡര്‍" ഇതെല്ലാം ചെയ്യുന്നത്. വഴിയരികില്‍ ഇറങ്ങി ഒരാള്‍ പെപ്സി കുടിച്ചാല്‍ എല്ലാരും അരവണ കുടിക്കുന്ന പോലെ ഭക്തിയോടെ കുടിക്കും. ഒരാള്‍ ഹല്‍വ വാങ്ങിയാല്‍ എല്ലാരും വാങ്ങി തിന്നും. ഇത്തരക്കാരെ പറ്റിക്കാന്‍ ഒരാള്‍ (മലയാളി ആണെന്ന് പ്രത്യേകം പറയേണ്ടല്ലോ...) നടത്തിയ നാടകമാണ് സംഭവം.
എന്‍റെ ബന്ധു പമ്പയില്‍ എത്തിയപ്പോള്‍ റോഡരുകില്‍ ആളൊഴിഞ്ഞ ഒരു സ്ഥലത്ത് ഒരാള്‍ ഒരു തേങ്ങയും പിടിച്ചു നില്‍ക്കുന്നത് കണ്ടു (കറുപ്പുടുത്തിട്ടുണ്ട്). എന്‍റെ ബന്ധുവും കൂടെയുള്ള നാലഞ്ചു പേരും നടന്നുപോയപ്പോള്‍ ആള്‍ അവിടെ അത്ര പന്തിയല്ലാത്ത വിധത്തില്‍ തിരിഞ്ഞു കളിക്കുന്നുണ്ട് (മലയാളം സംസാരിച്ചത് കേട്ടപ്പോള്‍ ആള്‍ക്ക് നമ്മുടെ ആളുകളാണെന്ന് പിടി കിട്ടിയിരിക്കും). കൂട്ടം തെറ്റിയതാണെന്നു കരുതി ഒന്ന് സഹായിച്ചേക്കാം എന്നു വെച്ച് ആളുടെ അടുത്തേക്ക് നീങ്ങിയപ്പോളാണ്‌ കണ്ടത്, ഒരു കല്ലില്‍ കുറെ പൂവെല്ലാം വിതറി റോഡിന്‍റെ അടുത്ത് വെച്ചിട്ടുണ്ട്. നമ്മുടെ ആളുകളുടെ മനസ്സില്‍ "ദാസനും വിജയനും" ഉണര്‍ന്നപ്പോള്‍ അവര്‍ കുറച്ചു നീങ്ങി നിന്ന് സംഗതി വീക്ഷിക്കാന്‍ തുടങ്ങി. നോക്കുമ്പോള്‍ തൊട്ടു പിന്നാലെ തെലുങ്ക്‌ സ്വാമിമാരുടെ ഒരു പട വരുന്നുണ്ട്. അവരെ കണ്ട ഉടനെ "സ്വാമി" ഉച്ചത്തില്‍ ശരണം വിളിച്ച് കല്ലിനു ചുറ്റും വലം വെക്കാന്‍ തുടങ്ങി. ഇത് കണ്ട് തെലുങ്കരെല്ലാം അവിടെ കൂടി നിന്ന് ശരണം വിളി തുടങ്ങി. ഉടനെ "സ്വാമി" കയ്യിലുണ്ടായിരുന്ന തേങ്ങ കല്ലിനു മുകളില്‍ എറിഞ്ഞു(ഉടഞ്ഞില്ല, ഉടച്ചില്ല എന്ന് പറയുന്നതായിരിക്കും ശരി). അപ്പോഴുണ്ട് തെലുങ്കന്മാരെല്ലാം തൊട്ടപ്പുറത്ത് തേങ്ങ വില്‍ക്കാനിരുന്ന പയ്യന്‍റെ (അങ്ങനെ ഒരാള്‍ കൂടി ആ പരിസരത്തുണ്ടായിരുന്നു, നേരത്തെ പറയാന്‍ വിട്ടുപോയി) തേങ്ങ വാങ്ങി തുരുതുരാ ഏറ്‌. തൊണ്ണൂറ്റിഅഞ്ചു ശതമാനവും പൊട്ടിയില്ല. കാര്യം കഴിച്ചു തേങ്ങയുടെ കാര്യമൊന്നും നോക്കാന്‍ നില്‍ക്കാതെ തെലുങ്കര്‍ അങ്ങ് പോയി.
ഇനിയാണ് യഥാര്‍ത്ഥ മലയാളിയുടെ ബുദ്ധിയുടെ ആഴം കാണാന്‍ കഴിഞ്ഞത്. "സ്വാമി"യും പയ്യനും എവിടുന്നോ ഓടിയെത്തിയ രണ്ടു പേരും ചേര്‍ന്ന് തേങ്ങയെല്ലാം വാരിക്കൂട്ടി പൊട്ടിയതും പൊട്ടാത്തതും വേര്‍തിരിച്ചു വെച്ചു. പൊട്ടാത്തതെല്ലാം പയ്യന്‍റെ ചാക്കിലേക്ക്... പൊട്ടിയതെല്ലാം വേറൊരു ചാക്കില്‍ അവിടെ കൂടിയവരില്‍ ഒരുത്തന്‍ കൊണ്ടുപോയി (ഏതോ ഹോട്ടലിലേക്കായിരിക്കും). ഇതെല്ലാം വെറും അഞ്ചു മിനുട്ടില്‍ കഴിഞ്ഞു. തട്ടിപ്പിന്‍റെ അടുത്ത എപ്പിസോഡിനായി "സ്വാമി" വീണ്ടും റെഡി.
സ്വാമിയേ ശരണമയ്യപ്പാ...

2 comments:

ഇസ്മായില്‍ കുറുമ്പടി (തണല്‍) said...

മലാളികളെ തോല്പിക്കാന്‍ നിങ്ങള്‍ക്കാകില്ല മക്കളേ..

T. J. Ajit said...

ദൈവത്തിന്റെ സ്വന്തം നാട്ടുകാരല്ലേ? നമുക്ക് എന്തുമാകാമല്ലോ?

Related Posts Plugin for WordPress, Blogger...
എല്ലാ രോഗങ്ങള്‍ക്കുമുള്ള ഒറ്റമൂലി... സൗഹൃദം